Ko Te Pūkenga. Koia nei te ingoa whakakotahi hou, hei whakapūmau i ngā whenu maha, ngā whakaaro maha hoki mō NZIST.
Kua pānuitia e Hon Chris Hipkins, Minita Mātauranga te ingoa o Te Pūkenga hei ingoa pūmau mō NZIST. I whakapuakina tēnei pānui e Te Minita i te tari matua o Te Pūkenga kei Wintec i Kirikiriroa.
Whai muri mai i ngā whakawhiti kōrero, whakawhiti whakaaro whānui me te hunga whaipānga, ka whakatauria te ingoa hou me tōna tohu ki te Minita e te Kaunihera o Te Pūkenga, ā, ka whakapūmautia i te rā nei.
E whakaata ana te ingoa o Te Pūkenga i te ngākau nui o tō mātou pūtahi hou ki tō Aotearoa tuku ihotanga ahurei me te hononga ki te tangata whenua.
He ingoa kaha, he ingoa whakakotahi hoki mō te pūtahi kua whakahaua māna e waihanga i tētahi pūnaha mātauranga ahumahinga kotahi e noho ai te ākonga koia tonu te pūtake. Arā, kia ngāwari te ako, kia arotau hoki ki ā te ākonga hiahia ake, kia mātua whakarite kia whai take tonu, kia rite hoki ngā pūkenga ki ngā hiahiatanga o ngā kaitukumahi i roto i te ao mahi e hurihuri tonu nei.
Huri noa i Aotearoa i tēnei ahiahi, i taea e ngā kaimahi, ngā ākonga me ngā pia o ngā Āpitihanga me ngā ITO Whakawhiti te hono atu mā te pāhotanga inamata me te whakarongo ki te pānuitanga, e whakanui ana i Te Pūkenga, tō mātou ingoa hou, ingoa whakakotahi.
“Ko tā te ingoa o Te Pūkenga he whakaahua i te whiwhi i ngā pūkenga tino whaihua mā te tuku mātauranga iho mai i tētahi tangata ki tētahi,” hei tā Stephen Town te Kaiwhakahaere Mātāmua o Te Pūkenga. “Ka whiwhi te ākonga i te mātauranga, ā, ā tōna wā ka tipu hei mātanga, hei ringa rehe ki aua pūkenga anō. Koia nei te wairua me te manako o te Pūkenga mō Aotearoa.”
Ko tō te Pūtahi ingoa ā-ture ko Te Pūkenga - New Zealand Institute of Skills and Technology.
“Ko tā te ingoa reo rua nei he whakapuaki i te ngākau nui o tēnei whakahaere ki te hononga i raro i te Tiriti o Waitangi, ā, he mea whakaata hoki i te whai take o tā te whakahaere kawenga mō ngāi Māori.
“Ka whānui tonu ngā toronga whakaaro me ngā whakawhiti kōrero mō tētahi ingoa, ā, i te mutunga iho ko Te Pūkenga te ingoa i whakatauria nātemea koia te ingoa pai mō mātou me tā mātou kaupapa – he pūtahi ko tōna tumu ko ngā pūkenga me tōna ngākau nui kaha nei ki te ākonga me Aotearoa,” te kī a Stephen.
Mātakihia te whakahaerenga o tēnei tūāhua .
Ka raranga wheako ngā ākonga o Wintec i te whakaterenga o te tohu o Te Pūkenga .