Ka pānuitia e te Kāwanatanga he kete āwhina mō ngā tauira mātauranga matua

Kua pānuitia e te Kāwanatanga tana kete āwhina mō ngā tauira mātauranga matua hei urupare ki Covid-19 hei āwhina hoki i ngā tauira i runga i ā rātou akoranga.

I kī te Minita Mātauranga a Chris Hipkins ko te hiahia o te Kāwanatanga he tuku tautoko tonu atu mō ngā tauira kia mōhio pū ai ka taea tonu e rātou te whai i ā rātou akoranga, ā ka tautokohia tonutia tae rā anō ki te wā e whakarite ai ngā kaituku mātauranga matua i ētahi huarahi tuku whakaakoranga.

E wātea mai ana tēnei kete āwhina mai i te Wenerei 15 Paengawhāwhā ki ngā tauira o Aotearoa ake e whakaurua ana ki ngā akoranga mātauranga matua wā kikī.

“Nā tēnei kete āwhina e whiwhi tonu ai ngā tauira kāore e taea te ako tuihono, ā rātou utu ā-pūtea i ngā wiki e whā o te rāhui nui, me te whā wiki anō ā muri ake. Kua rite kē tēnei āhuatanga mō ngā pūtea tautoko ā-wāhi noho,” te kī a te Minita.

Kua rite tēnei kete āwhina hei whakaea i ngā utu mā te whakapiki i te pūtea e wātea ana ki ngā tauira mō ngā utu ā-akoranga mai te $1000 ki te $2000; me te tuku tonu i ngā pūtea mō ngā wiki e waru, ki ērā tauira kāore e taea te ako tuihono.

Mō ētahi atu kōrero e pā ana ki te kete āwhina me pēhea hoki te tono i te pūtea āwhina toro atu ki StudyLink , ki ngā paetukutuku a Te Tāhuhu o Te Mātauranga , me kōrero rānei ki tō kaituku akoranga.